https://repository.ufe.edu.mn/xmlui/handle/8524/24 2026-06-30T21:20:44Z 2026-06-30T21:20:44Z Гансүх, Энхжин https://repository.ufe.edu.mn/xmlui/handle/8524/4839 2026-06-23T01:50:54Z 2026-06-23T00:00:00Z

Пилатесийн үйлчилгээний төвийг сонгоход нөлөөлөх хүчин зүйлсийн судалгаа Гансүх, Энхжин Сүүлийн жилүүдэд эрүүл мэндийн асуудал нэмэгдэж, пилатесийн үйлчилгээний эрэлт өсөхийн хэрээр хэрэглэгчид төвөө сонгохдоо ямар хүчин зүйлд тулгуурлаж байгааг тодорхойлох шаардлага бий болсон. Энэхүү судалгааны зорилго нь пилатесийн үйлчилгээний төвийг сонгох хэрэглэгчийн шийдвэрт нөлөөлөх хүчин зүйлсийг тодорхойлох явдал юм. Судалгааны хүрээнд хэрэглэгчийн зан төлөвийн онол болон үйлчилгээний чанар, үнэ, байршил, орчин, багшийн ур чадвар зэрэг хүчин зүйлсийг авч үзэн загвар боловсруулсан. Улаанбаатар хотын 385 хэрэглэгчээс цуглуулсан өгөгдөлд SPSS программ ашиглан шинжилгээ хийсэн. Судалгааны үр дүнд хэрэглэгчид пилатесийн төв сонгохдоо байршлын хүртээмж, цагийн хуваарийн уян хатан байдал, үйлчилгээний орчин, багшийн ур чадвар, үнийн зохистой байдлыг хамгийн чухал хүчин зүйл гэж үздэг нь тогтоогдсон. Хэрэглэгчид пилатест ерөнхийдөө эерэг хандлагатай боловч тогтмол хамрагдах эсэх нь үйлчилгээний чанараас илүүтэйгээр тухайн үйлчилгээ тэдний амьдралын хэв маяг, цаг хугацааны боломж, хувийн нөхцөлтэй хэр нийцэж байгаагаас ихээхэн хамаарч байна. Мөн хэрэглэгчдийг зан төлөвийн онцлогоор нь гурван сегментэд ангилж болох нь тогтоогдсон бөгөөд энэ нь пилатесийн үйлчилгээ эрхлэгчдэд хэрэглэгчийн хандлага, ойлголтод чиглэсэн стратеги боловсруулахад ач холбогдолтой юм.

2026-06-23T00:00:00Z Батжаргал, Ариунзаяа https://repository.ufe.edu.mn/xmlui/handle/8524/4832 2026-06-22T06:58:25Z 2026-06-22T00:00:00Z

ХЭРЭГЛЭГЧДИЙН ХУДАЛДАН АВАХ ШИЙДВЭР ГАРГАЛТАД НӨЛӨӨЛЖ БУЙ ОЛНЫ ТАНИЛ ХҮМҮҮСИЙН ХУВЬ ХҮНИЙ БРЭНДИЙГ ТОДОРХОЙЛОХ ХҮЧИН ЗҮЙЛСИЙН СУДАЛГАА Батжаргал, Ариунзаяа Судалгааны үндэслэл ба зорилго: Орчин үеийн сошиал медиа маркетингийн орчинд олны танил эрхмүүдийн нөлөөлөл хэрэглэгчийн шийдвэр гаргалтад хэрхэн нөлөөлж буйг судлах шаардлага нэмэгдэж байна. Энэхүү судалгааны зорилго нь олны танил хүний шинж чанарууд нь дагагчдын сэтгэл зүй болон худалдан авах зан төлөвт хэрхэн нөлөөлж буй механизмыг тодорхойлоход оршино. Арга зүй: Судалгаанд нийт 385 хэрэглэгч болон 7 олны танил эрхмийг хамруулж, хоёр талт асуулгын аргаар өгөгдөл цуглуулсан. Өгөгдлийг боловсруулахдаа Кронбахын альфа, хүчин зүйлийн шинжилгээ, корреляци, олон хүчин зүйлийн регресс, Baron & Kenny-ийн зуучлалын шинжилгээ болон кластер, Радар шинжилгээний аргуудыг ашигласан. Үр дүн: Регрессийн шинжилгээний үр дүнгээс харахад олны танил хүний брэндийн зохицол болон мэргэжлийн чадвар нь хэрэглэгчийн худалдан авах шийдвэрт хамгийн хүчтэй эерэг нөлөөг үзүүлж байна. Харин итгэл даах чадвар нь хэрэглэгч болон алдартны хооронд үүсэх сэтгэл зүйн дотно холбоо буюу парасоциал харилцааг бүрдүүлэх гол суурь хүчин зүйл болох нь тогтоогдсон. Судалгаагаар парасоциал харилцаа нь сурталчилгааны үр нөлөөнд шууд бус буюу хэсэгчилсэн зуучлагч шинжтэйгээр нөлөөлж байгааг статистик аргаар баталсан. Энэ нь олны танил хүний шинж чанарууд нь хэрэглэгчтэй тогтоосон сэтгэл зүйн холбоогоор дамжин борлуулалтын үр ашгийг нэмэгдүүлдэг механизм болохыг харуулж байна. Дүгнэлт: Олны танил хүний мэргэжлийн байдал болон брэндтэй нийцтэй байх нь шууд борлуулалтыг өдөөдөг бол, итгэлцэлд суурилсан парасоциал харилцаа нь урт хугацааны маркетингийн үр нөлөөг бэхжүүлэх стратегийн "гүүр" болж байна.

2026-06-22T00:00:00Z Бат-Очир, Энхсолонго https://repository.ufe.edu.mn/xmlui/handle/8524/4831 2026-06-22T06:58:17Z 2026-06-22T00:00:00Z

Гэр бүлийн хамтын чөлөөт цаг зарцуулалтын хэрэгцээг тодорхойлох судалгаа Бат-Очир, Энхсолонго Энэхүү судалгааны ажлаар сургуулийн насны хүүхэдтэй гэр бүлийн хамтын чөлөөт цаг зарцуулалтын эрэлт хэрэгцээ, одоогийн түвшинг тогтоож, үүнд саад болж буй хязгаарлалтуудыг тодорхойлохыг зорьсон болно. Судалгааны онолын үндэслэл болгон “Гэр бүлийн үйл ажиллагааны онол”-ыг ашигласан бөгөөд хязгаарлалтуудын хувьд сэтгэл зүйн, цаг хугацааны, мэдлэг мэдээллийн, сонирхлын зэрэг чөлөөт цагаа өнгөрүүлэхэд нөлөөлдөг хүчин зүйлсийг авч үзсэн. Судалгаанд Улаанбаатар хотод амьдардаг гэр бүлүүдийн төлөөлөл болох 439 хүн оролцсон бөгөөд үүний 387 нь сургуулийн насны хүүхэдтэй гэр бүлийн төлөөлөл болж чадсан. Боловсруулалтад SPSS программыг ашиглан хүчин зүйлийн шинжилгээ, регрессийн шинжилгээ, кластер шинжилгээ, FLAP загварын шинжилгээ, бүлгийн дундаж утгад суурилсан шинжилгээ зэргийг хийж гүйцэтгэв. Судалгааны үр дүнд гэр бүлийн хамтын чөлөөт цаг зарцуулалтын түвшин Монгол гэр бүлүүдийн хувьд дунджаас доогуур үзүүлэлттэй байгаа нь тодорхойлогдсон бөгөөд үүний дотор үндсэн чөлөөт цаг нь тэнцвэржүүлэх чөлөөт цагаас илүү оролцоотой байгаа нь тогтоогдсон. Мөн үл хамаарах хувьсагчид болох сэтгэл зүйн, мэдлэг мэдээллийн, цаг хугацааны хязгаарлалтууд зуучлагч хувьсагч болох сонирхлын хязгаарлалтаар дамжин чөлөөт цагийн оролцооны түвшинд сөргөөр нөлөөлж буй нь батлагдав. Мөн судалгаанд оролцогчдын үнэ цэн, үйлчилгээнд чухалчилдаг хүчин зүйлсэд үндэслэн 3 сегмент гарч ирэв. Тэдгээр нь бага, дунд, өндөр хүлээлттэй гэсэн 3 сегмент бөгөөд тэдгээрийн персона болон тэдэнд хэрэгцээт үйлчилгээг хүргэх маркетинг, стратегийг санал зөвлөмжийг боловсруулав. Энэхүү судалгаа нь гэр бүлийн чөлөөт цагаа хамтдаа өнгөрүүлэхэд дэмжих бүтээгдэхүүн үйлчилгээний зах зээлийг хөгжүүлэх суурь ойлголтыг бий болгож, чөлөөт цагаа өнгөрүүлэхэд саад болж буй хүчин зүйлсийг статистик ач холбогдлын түвшинд загварчлан томьёолсон Монгол дахь анхны судалгаа болж буйгаараа онцлог бөгөөд цаашдын судалгаа, бүтээгдэхүүн үйлчилгээний хөгжүүлэлт, нийгэмд чөлөөт цагийн ач холбогдлыг түгээх үйл ажиллагаанд бодит хувь нэмэр оруулах боломжтой байна.

2026-06-22T00:00:00Z Бямба-Эрдэнэ, Нандин-Эрдэнэ https://repository.ufe.edu.mn/xmlui/handle/8524/4828 2026-06-22T06:57:51Z 2026-06-22T00:00:00Z

ХЭРЭГЛЭГЧДИЙН ХУДАЛДАН АВАХ ШИЙДВЭР ГАРГАЛТАД ФЕЙСБҮҮК КОНТЕНТЫН ҮЗҮҮЛЭХ НӨЛӨӨЛЛИЙН СУДАЛГАА /KFC брэндийн жишээн дээр/ Бямба-Эрдэнэ, Нандин-Эрдэнэ Технологийн хөгжил, сошиал медиа платформын хэрэглээ эрчимтэй өсөн нэмэгдэж буй өнөө үед хэрэглэгчдийн худалдан авах зан төлөвт цахим контентын үзүүлэх нөлөө улам бүр чухал болж байна. Ялангуяа фейсбүүк платформ нь Монгол улсад хамгийн өргөн хэрэглэгддэг сошиал сувгуудын нэг бөгөөд байгууллагууд хэрэглэгчидтэй харилцах, бүтээгдэхүүн үйлчилгээгээ сурталчлах үндсэн хэрэгсэл болгон ашиглаж байна. Иймээс энэхүү судалгаагаар KFC брэндийн фейсбүүк контент хэрэглэгчдийн худалдан авах шийдвэр гаргалтад хэрхэн нөлөөлж байгааг тодорхойлохыг зорьсон. Судалгааны хүрээнд фейсбүүк контентын хэрэгцээтэй байдал, мэдээллийн хэрэгцээт байдал, хамааралтай байдал, интерактив байдал, сонирхолтой байдал болон зуршил зэрэг хүчин зүйлсийг хэрэглэгчийн худалдан авах шийдвэртэй хамааруулан судалсан. Судалгаанд Улаанбаатар хотын фейсбүүк платформыг идэвхтэй ашигладаг, KFC бүтээгдэхүүн худалдан авч байсан хэрэглэгчдийг хамруулсан бөгөөд өгөгдлийг санал асуулгын аргаар цуглуулсан. Нийт 385 оролцогчоос авсан мэдээллийг Excel болон SPSS программ ашиглан боловсруулж, давтамжийн шинжилгээ, корреляцийн шинжилгээ, регрессийн шинжилгээ болон кластер шинжилгээ хийсэн. Судалгааны үр дүнгээс фейсбүүк контентын мэдээллийн чанар, интерактив байдал, хэрэглэгчийн сонирхлыг татах чадвар нь худалдан авах шийдвэрт эерэг нөлөө үзүүлдэг болох нь тогтоогдсон. Ялангуяа хэрэглэгчдэд хэрэгцээтэй, сонирхолтой, хамааралтай контент нь брэндийн талаарх эерэг хандлага болон худалдан авах хүсэл эрмэлзлийг нэмэгдүүлдэг байна. Мөн хэрэглэгчдийн фейсбүүк ашиглах зуршил өндөр байх тусам тухайн контентын нөлөөлөл илүү хүчтэй байгааг судалгааны үр дүн харуулсан. Энэхүү судалгаа нь Монголын түргэн хоолны салбарын хүрээнд фейсбүүк маркетингийн хэрэглэгчийн зан төлөвт үзүүлэх нөлөөг тодорхойлсон практик ач холбогдолтой бөгөөд KFC болон ижил төрлийн байгууллагуудад сошиал медиа контентын стратегиа оновчтой боловсруулахад ашиглах боломжтой юм. Мөн цаашдын судалгаанд сошиал медиа маркетинг болон хэрэглэгчийн худалдан авах зан төлөвийн чиглэлээр онол, практикийн суурь мэдээлэл болох ач холбогдолтой.

2026-06-22T00:00:00Z