Хураангуй:
Монгол Улс 2024–2028 онд ураны мега төслийг хэрэгжүүлэхээр төлөвлөж буй энэ үед өмнөх туршлага, ялангуяа Оюу Толгойн хөрөнгө оруулалтын үеийн макро эдийн засгийн алдааг дахин давтахгүй байх нь чухал зорилт болж байна. Энэхүү судалгаа нь Монгол–Францын хамтарсан ураны төслийн гадаадын шууд хөрөнгө оруулалтын шокын эдийн засагт үзүүлэх богино болон дунд хугацааны нөлөөг том хэмжээний бейсийн вектор авто регрессив загвар ашиглан тооцоолсон. Судалгаанд Манделл-Флемингийн жижиг нээлттэй эдийн засгийн онолд тулгуурлан 21 макро эдийн засгийн хувьсагчдыг сонгон авч, 2011 оны 1-р улирлаас 2024 оны 4-р улирал хүртэлх хугацаанд үнэлгээ хийсэн болно. Үр дүнд ураны мега төсөл ГШХО-ын санхүүжилттай хэрэгжсэнээр эдийн засгийн өсөлт, ажил эрхлэлтийг нэмэгдүүлэхийн зэрэгцээ нөгөө талаас инфляц, хүүгийн дарамтыг нэмэгдүүлж, богино болон дунд хугацаанд мөнгөний бодлогын зохицуулалт шаардлагатай болохыг харуулсан. Энэхүү судалгаа нь ГШХО-ын санхүүжилттай мега төслийн үр нөлөөг урьдчилан тооцох, бодлогын оновчтой шийдвэр гаргахад тоон үндэслэл бүхий практик суурь болж өгнө.
