Хураангуй:
Олон улсад төрийн байгууллагууд эрсдэлийн удирдлагын ISO 31000:2018 стандартыг удирдлага болгон эрсдэлийн удирдлагыг өргөн хамрах хүрээ, системтэйгээр хэрэгжүүлж байгаа бол манай улсын төрийн байгууллагуудын хувьд хэсэгчилсэн байдлаар дотооддоо эрсдэлийн удирдлагыг хэрэгжүүлэн ажилладаг учраас төрийн байгууллагын эрсдэлийн удирдлагын хамрах хүрээг нэмэгдүүлэх шаардлагатай байна. Энэхүү судалгааны ажил нь төрийн байгууллагын эрсдэлийн удирдлагын тогтолцооны өнөөгийн байдал, хэрэгжилт, цаашдын хөгжлийн чиг хандлагыг олон улсын стандартад нийцүүлэн үнэлэх, тасралтгүй сайжруулалтын хөтөлбөр, зөвлөмж боловсруулах зорилготой юм. Судалгаанд төрийн 74 байгууллага, 4,294 албан хаагч оролцсон ба чанарын болон тоон аргыг хослуулан ISO 31000, COSO зэрэг олон улсын загвартай харьцуулж судалгаа хийсэн. Судалгааны үр дүнгээс харахад Монгол улсын төрийн байгууллагуудын эрсдэлийн удирдлагын хэрэгжилт харилцан адилгүй, системийн түвшинд төлөвшөөгүй байгаа ба, мэргэшсэн хүний нөөц дутмаг, байгууллагын дотоод соёлд нэвтрээгүй, дэмжлэгийн тогтолцоо бүрдээгүй байна. Иймд эрсдэлийн нэгдсэн бодлого, журам боловсруулах, ажилчдынхаа эрсдэлийн удирдлагын талаарх мэдлэг ойлголтыг нэмэгдүүлж, чадавхжуулах сургалт семинарыг олшруулах, мэдээллийн сан болон хяналтын систем нэвтрүүлэх нь зүйтэй.
